ഹൈവേ: വീരയിൽ നിന്നും മഹാബീറിലേക്കുള്ള ദൂരം



രേഷ്മ മുരളീധരൻ 

 "നീ എന്നെ എവിടെ നിന്നാണോ കൊണ്ടുവന്നത് അവിടേക്ക് തിരിച്ചുപോവാൻ ഞാൻ ആഗ്രഹിക്കുന്നില്ല.

എവിടേക്കാണോ നീ എന്നെ കൊണ്ടുപോവുന്നത് അവിടേക്ക് എത്തിച്ചേരാനും ഞാൻ ആഗ്രഹിക്കുന്നില്ല.
പക്ഷെ ഈ വഴി എത്രയോ സുന്ദരമാണ്.
അതുകൊണ്ട് ഈ യാത്ര അവസാനിക്കാതിരിക്കാൻ ഞാൻ ആഗ്രഹിക്കുന്നു" ...


യാത്ര എന്ന ആശയത്തെ മുൻനിർത്തി ആലിയാബട്ടിനേയും റൺദീബ് ഹൂഡയേയും കേന്ദ്ര കഥാപാത്രങ്ങളാക്കി ഇംതിയാസ് അലിയുടെ  സംവിധാനത്തിൽ 2014-ൽ പുറത്തിറങ്ങിയ ബോളിവുഡ് ചിത്രമാണ് ഹൈവേ. ജീവിക്കാൻ മറന്നുപോയ രണ്ടു വ്യക്തികളുടെ ജീവിതത്തിൽ സംഭവിച്ചുപോവുന്ന മാറ്റങ്ങളെയാണ് സിനിമ ചൂണ്ടിക്കാണിക്കുന്നത്. തികച്ചും അപരിചിതരായ അവർ  അപ്രതീക്ഷിതമായി കണ്ടുമുട്ടുകയും പരസ്പരം വിട്ടുപിരിയാനാവാത്തവിധം അടുക്കുകയും ചെയ്യുന്നതോടെ ഹൈവേ പ്രേക്ഷക മനസ്സിലേക്ക് കൂടുതൽ ആഴ്ന്നിറങ്ങുന്നു. വീര തിരിപ്പതി, മഹാബീർ ബാട്ടി എന്നീ കഥാപാത്രങ്ങളെ ആലിയാബട്ടും റൺദീബ് ഹൂഡയും അനശ്വരമാക്കി. 


ഒരു വലിയ ഇൻഡസ്ട്രിയലിന്റെ ഏക മകളാണ് വീര തിരിപ്പതി. വീരയുടെ വിവാഹ തലേന്ന് രാത്രി, ഭാവി വരനുമൊത്ത് വീര പുറത്തുപോവുന്നിടത്താണ് സിനിമ ആരംഭിക്കുന്നത്. തുടർന്ന് ഒരു സംഘം ആളുകൾ തങ്ങളുടെ സുരക്ഷക്കായി വീരയെ തട്ടിക്കൊണ്ടു പോവുകയും സംഘ തലവനായ മഹാബീർ ബാട്ടിയെ വീര കണ്ടുമുട്ടുകയും ചെയ്യുന്നതോടെ വീരയുടെ ജീവിതം പുതിയ വഴിത്തിരിവിലേക്ക് കടക്കുന്നു.



തനിക്ക് മറ്റാരിൽനിന്നും ലഭിക്കാത്ത സംരക്ഷണവും സുരക്ഷിതത്വവും മഹാബീറിൽനിന്നും ലഭിക്കുന്നുണ്ടെന്ന് മനസ്സിലാക്കിയ വീര അപരിചിതനാണെന്ന യാഥാർത്ഥ്യത്തെ മറന്നുകൊണ്ട് മാനസികമായി മഹാബീറിലേക്കടുക്കുന്നു. തന്റെ ജീവിതത്തിലൂടെ കടന്നുപോയ കറുത്ത അധ്യായങ്ങൾ വീര, മഹാബീറുമായി പങ്കുവെക്കുന്നു. 
വികാരങ്ങൾ നഷ്ട്ടപ്പെട്ട മഹാബീറിന്റെ ജീവിതത്തിലേക്കുള്ള വീരയുടെ കടന്നുവരവ് അയാളുടെ മനോഭാവത്തിലും മാറ്റങ്ങൾ സൃഷ്ടിച്ചു. ചിരിക്കാനും കരയാനും മറന്നുപോയ മഹാബീർ താൻപോലുമറിയാതെ ഉള്ളു തുറന്നു ചിരിക്കുകയും കരയുകയും ചെയ്യുന്ന പുതു മനുഷ്യനായ് മാറപ്പെട്ടു. 

പ്രണയത്തിന്റെ മധുരം നുണഞ്ഞിരിക്കുന്ന വീരയുടേയും മഹാബീറിന്റെയും ജീവിതത്തിലേക്ക് ഒട്ടും പ്രതീക്ഷിക്കാതെയാണ് വിധിയുടെ കറുത്ത കരങ്ങൾ വന്നെത്തിയത്. മരണമെന്ന യാഥാർത്ഥ്യം മഹാബീറിനെ തേടിയെത്തുന്നതോടെ സിനിമ അതിന്റെ അന്തിമഘട്ടത്തിലേക്ക് കടക്കുന്നു. പ്രതിസന്ധികളേറെ നേരിടേണ്ടി വന്ന വീര, മഹാബീറിന്റെ മരണശേഷം വിധിയെ മറികടന്നുകൊണ്ട് ശിഷ്ടകാലമത്രയും മഹാബീറിന്റെ ഓർമ്മകളിൽ  ജീവിക്കുന്നു.പ്രേക്ഷക മനസ്സിനെ വൈകാരികമായി സ്വാധീനിച്ച സിനിമയാണ് ഹൈവേ. സാമൂഹ്യ പ്രശസ്തമായ ഒരു പ്രമേയം പ്രേക്ഷകരിലേക്കെത്തിച്ച ഇംതിയാസ് എന്ന സംവിധായകന്റെ കഴിവ് തികച്ചും അഭിനന്ദനാർഹമാണ്.
 

Post a Comment

Previous Post Next Post